Урыссуда мөселман зираты ачылды

Ютазы муниципаль районы үзәгендә мөселман зираты ачылды. Вакыйга уңаеннан, яңа зират капкасы янында ислам дине вәкилләре җыелган иде. Аларга мөрәҗәгать итеп, Татарстанның көньяк-көнчыгыш казыяте казые, районның имам-мөхтәсибе, "Фәнис” мәдрәсәсе директоры Марат хәзрәт Мәрданшин зиратның кешенең мәңгелек йокыга талу урыны булуын билгеләп үтте. Һәм мондый урынны сайлауга кешенең тиешле мөнәсәбәт күрсәтүе зарур.

Үз чиратында, район башлыгы Рөстәм Нуриев район җитәкчелегенең ютазылыларның дингә ышану мәсьәләсенә зур ихтирам белән каравына басым ясады. Православиегә дә, ислам диненә дә бер дәрәҗәдә игътибар күрсәтелә.

Яңа зират ачу – иске каберлекләрне төзексез хәлдә калдыру дигән сүз түгел, дип ассызыклады Нуриев. Православие һәм мөселман зиратында өмә үткәреләчәк. Христианнар зиратының ихатасын тәртипкә китерү, мөселман зиратын куаклыклардан арындыру мәҗбүри.

Әлеге изге эштә күп кенә сәнәгать предприятиеләренең булышлык күрсәтүе билгеләп үтелде. Мәсәлән, имам-мөхтәсиб Марат хәзрәт "Электросоединитель” заводын, Әпсәләм төзелеш конструкцияләре һәм материаллары комбинатын , "Урыссу җылылык челтәрләре” җәмгыятен һәм башкаларны әйтеп узды.

Чыгышлар тәмамланганнан соң, адәм баласының мәңгелек йортын изгеләштерүче дога авазлары яңгырады, дип хәбәр итә "Ютазы таңы” газетасы.
Чыганак: "Татар-информ"