Мөфтияттә Аксакаллар Шурасы утырышы булды. Вакыйга. Татар-Ислам

2013 Май 08

Кичә Татарстан мөфтияте бинасында Аксакаллар Шурасы утырышы булып узды. Анда дин өлкәсендә озак еллар дәвамында хезмәт куйган өлкән буын вәкилләре, бүгенге көндә дә төрле районнарда имам һәм мөхтәсиб вазифаларын башкаручылар катнашты. Алар ТҖ МДНнең киңәш бирү органы буларак, бу оешманың киләчәктә тормышка ашырга тиешле планнарын тикшерделәр.

Көн тәртибенә берничә мәсьәлә куелып, шуларның берсе яңа җитәкчене сайлаудан гыйбарәт иде.
Аксакаллар Шурасы утырышында Татарстан мөфтие Камил хәзрәт Сәмигуллин, аның урынбасарлары Илдар хәзрәт Баязитов һәм Рөстәм хәзрәт Хәйруллин, җөмһүриятебезнең Баш казые Җәлил хәзрәт Фазлыев катнашты. Утырышка 12 аксакал килгән иде.

Аксакаллар алдында чыгыш ясаганда, Камил хәзрәт Диния нәзарәтенең нәтиҗәле эшләвендә һәм төрле мәсьәләләрне хәл итүдә киңәш бирү органының мөһим роль уйнавын билгеләп узды.

"Без киңәш сорап, сезгә даими рәвештә мөрәҗәгать итәчәкбез, чөнки сезнең дини өлкәдә биниһая зур тәҗрибәгез бар”,-дип билгеләп узды Татарстан мөфтие. Аннары мөфти хәзрәтләре Җиңү бәйрәме уңаеннан, ТҖ МДНнең "Халык алдындага казанышлары өчен” медален Ватан сугышында катнашкан 3 ветеранга – Казандагы "Хәтер” мәчете имам-хатибы Харис хәзрәт Салихҗанга, шулай ук башкаладагы "Мәдинә” мәчете имам-хатибы Гыйльмулла хәзрәт Хәлиуллинга, "Әҗем” мәчетенең элекке имам-хатибы Һади хәзрәт Әхмәтвәлиевкә тапшырды.

Мөфтидән соң, Татарстанның Баш казые Җәлил хәзрәт Фазлыевка сүз бирелде. Соңрак җыелышны да Җәлил хәзрәт алып барды. Ул ТҖ МДНнең Аксакаллар Шурасы республикада абруй казанган 17 олпат имам-мөхтәсиб һәм имамнардан торачагы турында мәгълүмат ирештерде. Бу шураның максаты – аеруча мөһим мәсьәләләр буенча мөфтигә киңәш-табыш итү.

Аксакаллар Шурасы җитәкчесенә Нурлат районы имам-мөхтәсибе Айрат хәзрәт Аюпов тәкъдим ителде. Ул бертавыштан бу оешманың башлыгы итеп сайланды.

Шунысын билгеләп узу мәслихәт: яңа җитәкче сайланганнан соң, аксакаллар аның янына килеп, котлап кына калмадылар, бәлки шураның эшен яхшырту буенча тәкъдимнәрен дә әйтергә керештеләр. Аерым алганда, аена бер тапкырдан да ким булмаган очрашу турында карар кабул кылдылар. Якын арада алар ТҖ МДН каршындагы Аксакаллар Шурасының вазифалары концепциясен барлыкка китерү хакында да сөйләштеләр.