Бергәлекнең кадере арта

Иң изге байлык – күңел байлыгы. Тәвәккәллек – иң изге дәрәҗә.
Хәдис

Күптән түгел Казанда мөселман яшьләре әйдәманнарының биш көнлек җыены булып узды. Ул “Мәхәллә 2.1” дип аталды. Анда Татарстан төбәкләреннән, Идел-Урал, Үзәк Россия, Төньяк Кавказдан килгән егетләр, кызлар катнашты.
Килүчеләрнең һәрберсе үзенең эш-гамәлләрен күрсәткән проектларын яклады. Биредә алар сөйләү осталыгына, үзара аңлашу, дәлилләү һәм ышандыру хикмәтләренә дә төшенделәр. Күренекле дин әһелләре белән дә очраштылар, таныштылар.

Соңгы көнне “Казан” милли мәдәният үзәгендә хикмәтле тагын бер очрашу булды. Анда “Ярдәм” Милли ислами хәйрия фондының вице-президенты, югары категорияле табиб, медицина фәннәре кандидаты, республиканың атказанган табибы, информатиция буенча халыкара академиянең әгъза-мөхбире Илдар Фирдәвес улы Хисаметдиновның ясаган чыгышын яшьләр аеруча дулкынланып тыңлады. “Ярдәм” мәчетендә дини гыйлем алучы күрмәүчеләрнең уңышлары – Брайль системасында Коръән укырга өйрәнүләре хакында тыңлау яшьләрне бигрәк тә ихласландырды.

Танылган мөфти Тәлгать хәзрәт Таҗетдиннең чыгышы да күп кенә яшьләрнең сорауларына җавап булып яңгырады. Эшлекле киңәшләр, фикерләр аша яшьләрнең күңеленә хикмәтле юл ачылды.

Мәхәллә җыены “Казан” милли мәдәният үзәгендә уздырылган “Илаһи моң” фестивале белән төгәлләнде. Илаһи моң ияләре мөнәҗәтләр әйтеп, һәр күңелне тетрәндерде. Яшьләр җәмгыятебезне савыктыруда динебезнең роле хакында да вәгазьләр тыңладылар, башкалабыз Казанның “Ярдәм”, “Кол Шәриф” һәм башка мәчетләрендә булдылар, башка истәлекле урыннарны карадылар.

Бу очрашулар дини алгарышның бик мөһим чарасы булып тора. Аларда бергәлекнең кадере арта.

Әлмира ҺӘДИЯ, җәмәгать эшлеклесе, “Ярдәм” мәчете