Украина мөслимәләренә паспортка яулыктан фотога төшүне тыйганнар

Киев шәһәренең административ суды Бакчасарайда яшәүче Сусанна Исмәгыйлеваның шикаятен кире какты. Ул Украина Эчке эшләр министрлыгыннан паспортка яулыктан килеш фотога төшүне рөхсәт итүләрен сорап мөрәҗәгать иткән иде. Кырымда чыгучы «Возрождение» газетасы хәбәр итүенчә, суд эше 4 июньдә төгәлләнгән.

Материалларын тикшергәннән соң, суд С.Исмәгыйлеваның шикаятен канәгатьләндермәскә булган. «Суд мөслимәләрнең хокукы кысылмый, дип тапты. Нәтиҗәдә, алар алга таба да паспортка яулыксыз фотога төшәргә тиеш була», – дип билгеләп үтә газета. Шулай ук С.Исмәгыйлева әлеге суд карарына апелляция бирергә җыена, дип тә билгеләп үтә.

Украинада паспорт рәсмиләштерү Конституциядәге дини йолаларны каршылыксыз үтәүне гарантияләүче 35 маддәсенә һәм «Намус һәм дини карашлар иреге» турындагы законның 3 маддәсенә каршы килә.

Сүз уңаеннан, 2000 елда Россиядә дә шушындый ук очрак булган иде. Ул вакытта мөслимәләр шикаятен суд канәгатьләндерде.