V Республика ифтарын уздыру урыны үзгәрде

Ифтарга әзерлек алып барган вакытта аның “Казан Арена”да оештырылачагы хәбәр ителгән иде. Ә күптән түгел генә таратылган Чакыру билетларында Республика ифтарының 27 майда Үзәк стадионда узачагы язылган иде.

Бүген Татарстан мөфтиятеннән килгән рәсми хәбәргә караганда, ифтар 15 июньдә Теннис академиясендә булачак. Республика ифтарының “Казан Арена”да һәм Үзәк стадионда оештырыла алмау сәбәпләре Казанда июньдә узачак Конфедерация Кубогы матчлары белән бәйле.

Алдан игълан ителгәнчә, Республика ифтарында 15 мең кеше түгел, ә 10 мең кеше авыз ача алачак. Республика ифтарын РФ Мөселман эшкуарлар ассоциациясе, ТР мөселманнары Диния нәзарәте һәм “Казан Арена” стадионы дирекциясе оештыра. Әлеге чара мөселман өммәтен берләштерүгә, тынычлык, игелек, шәфкатьлелек һәм юмартлылык сыйфатларын үстерүгә хезмәт итә.

Республика ифтарында күпбалалы һәм азкеремле гаиләләр, ятим балалар, физик мөмкинлекләре чикләнгән кешеләр, социаль яктан начар якланганнар һ.б. катнаша.

Римма Гатина.