Президент амнистиясе үз көченә керде

Россиянең Дәүләт Думасы тарафыннан 18 декабрьдә кабул ителгән амнистия турындагы карар шул ук көнне үз көченә керде, чөнки ул кичә кич белән хокук мәгълүматы интернет порталында басылып чыкты. Шул рәвешле, Конституциянең 20 еллыгына багышланган амнистия үз көченә керде.

Хокук мәгълүматы порталында документларны бастыру "Российская газета” һәм "Парламентская газета” дагы кебек үк рәсми булып санала. "РГ” ның сайтында әйтелгәнчә, инде бу карарның язмасы алар тарафыннан кабул ителеп алынган һәм ул бүген басылып чыга.

Президент амнистиясе 25 мең кешенең язмышына кагылачак. Документта күрсәтелгәнчә, төрмәдән азат ителү балигъ булмаган балалары булган аналарга, 18 яшенә кадәр җинаять кылганнарга, Россиядә атказанган хезмәтләре булган гражданнарга кагыла. Амнистия шулай ук кайбер резонанслы эштә катнашучыларга да кагылыр, дип көтелә. Әйтик, Russy Riot төркемендәгеләргә, "Болотная площадь»тагы тәртипсезлекләрдә катнашучыларга һәм "Арктик Санрайз” экипажы әгъзаларына, шулай ук саксызлык күрсәткән элекке саклану министры Анатолий Сердюковка да кагылачак.

Амнистия педофилия белән бәйле җинаятьләргә, террорчылыкка һәм көч кулланып, вәкаләтләрен арттырганнарга да кагылмаячак. Амнистия массакүләм тәртипсезлек оештыручыларга, шул исәптән оппозициядәге Сергей Удальцевка, шулай ук ЮКОС эшендә катнашучыларга эләкмәячәк.

Амнистия проектын Думага 2013 елның декабрендә Президент Владимир Путин кертте. Конституциянең 20 еллыгына багышланган документ Президент администрациясе һәм кеше хокуклары Советы хезмәткәрләре тарафыннан әзерләнде.