Машина упкын буенча 100 метр очып барган

"РИА Новости” агентлыгыннан алынган хәбәрләргә караганда, кичә, 9 гыйнварда, "Дакар” ралли-марафонында ике журналист һәлак булган. Алар утырган автомобиль 100 метр упкын буенча очып барып, чокырга егылып төшкән. Алгы рәткә утырган 20 яшьлек студент Агустин Мина һәм 51 яшьлек Даниэль Амброзио шундук җан биргән.

Раллидә эшләүче журналистларның Катамарк каласыннан Сан-Мигель-де-Тукуман шәһәренә кайтып барышы булган бу. Андальгала департаментындагы «Куэста-дель-Клавильо» автоюлында аларның Ford Ranger машинасы чатка сыешмый һәм упкынга егылып төшә. Арткы урындыкларда утырган ике фотограф -31 яшьлек Мартин Дельгадо һәм 36 яшьлек Родриго де Кесада исән кала. Алар Сан-Мигель-де-Тукумандагы госпитальгә салына.

"Автомобиль упкын буенча 100 метр очып барып, чокырга егылып төшкән. Алгы урындыкларда утыручылар шунда ук һәлак булганнар”,-дип хәбәр иткән исән калган фотограф Мартин Дельгадоның әтисе, "Супер Ралли” журналы менеджеры Франсиско Дельгадо.

Әлеге журналистлар бригадасы раллины оештыручылар тарафыннан рәсми рәвештә аккредитация үтмәгән булган.