"Мәрҗани"дә остазларны кунак иттеләр

Өлкәннәр көне уңаеннан, Казандагы “Мәрҗани” мәчетендә төрле елларда олы хезмәт куйган хәзрәтләрне, абыстай һәм мөгаллим-мөгаллимәләрне чәй табынына җыйдылар.

Казан мөселманнары имам-мөхтәсибе, “Мәрҗани” ммәчете имам-хатибы Мансур хәзрәт Җәләлетдин олы рәхмәт хисләре белән барысын да котлады һәм хәерле сәламәтлекләр теләде.

Мансур хәзрәт “Мәрҗани” мәчетенең тарихын тәфсилләп аңлатты. Иске каралтылар турында да, бүгенге яңартылганнары хакында да искә төшереп узды ул. Остазлар исә үзләре укыткан шәкертләрне хәтерләрендә яңарттылар.
Әйе, “Мәрҗани” мәчетендәге чәй табыны күпләрнең хатирәсен яңартты.

Биредә озак еллар укыткан Нуркамал абыстай Миңнебаева, Сәлимә абыстай Миңнебанат, Разия Закирова, Мөнир хәзрәт күп истәлекләрен замандашларына җиткерделәр. Мөнир хәзрәт бүгенге көндә Иске Татар бистәсе зиратында хезмәт күрсәтә. Ул әлеге зиратта иллеләп хәзрәтнең каберен карарга тиешлегебезгә игътибарны юнәлтте. Бик авыр, фаҗигале елларда да сакланып калган бердәнбер мәчетнең элекке имамнары Әхмәтзәки хәзрәт, Габделхәбир хәзрәт, Габделхак хәзрәт Саматовны искә төшердек, алар рухына багышлап дога кылдык.

Бу мәчеткә кунакка килүчеләргә күчтәнәчләр дә бүләк иттеләр. Әйе, изгелек, бер-беребезгә олы хөрмәт һәм мәрхәмәт мәңгелек булса иде!

Әлмира ҺӘДИЯ, җәмәгать эшлеклесе