Казанда Саматов укулары узачак

12 октябрьдә Мәрҗани мәчетендә өченче Саматов укулары узачак. Укулар 2010 елдан башлап Татарстанның беренче казые, Мәрҗани мәчете имамы, галим Габделхак Саматовка (1930-2009) багышлап үткәрелә.

Габделхак хәзрәт - 20 гасыр азагы-21 гасыр башындагы дин галимнәренең иң күренеклесе, революциягә кадәрге татар дини мирасын дәвам итүче, ислам диненә багышланган күп китаплар авторы. Фәнни җыенда «Рухи мирас» исемле премия тапшыру да гадәткә керде.

Сәгать 9 да башланачак укуларга Саматовның улы, Ханти-Мансы мөфтие Таһир Саматов, Чувашстан һәм Мәскәү мөфтие Әлбир Крганов, Мордовия мөфтие Фәһим Шәфиев, Бөтендөня Татар конгрессының Казан бүлеге җитәкчесе Фәрит Мифтахов чакырулы.