Казахстанда яңа баш мөфти сайланды

41 яшьлек Ирҗан Мәямирев сишәмбе көнне Астанада үткәрелгән Диния нәзарәтенең чираттан тыш корылтаенда Казахстанның яңа баш мөфтие итеп сайланды. Аңа кадәрге баш мөфти Габсаттар Дәрбисали үз теләге белән мөфти вазифасын үтәүдән туктады, дип хәбәр итте Алма – Атаның Үзәк мәчете сайты.

Бу корылтай баш мөфтинең теләге белән уздырылган. 13 ел буена баш мөфти вазифасын башкарган Габсаттар хәзрәт хәзер фәнни-мәгариф өлкәсендә хезмәт куячак.

Ирҗан Мәямирев 1993 елда хәрби хезмәттән кайткач, "Әл-Әзһәр” Ислам университетының шәригать һәм хокук факультетына укырга керә, аны 2006 елда тәмамлый. 2006 – 2008 елларда ул Мисыр мөфтиятенең фәтва кабул итү бүлегендә тәҗрибә туплый, ягъни практика уза. 2011 елда Җидепалата (Семипалатинск) төбәгенең имамы итеп билгеләнә. "Интерфакс" агентлыгыннан алынган мәгълүматларга караганда, Ирҗан хәзрәт өйләнгән, 3 баласы бар.