Әйләнеп кайтасылары булмасын...

Әлеге дә баягы, безнең кадерле баш киемебез – яулык мәсьәләсе әйләнә дә кайта, әйләнә дә кайта. Күптән түгел "Яулыклы кызларны укырга кертмәскә” дигән хәбәр килеп ишетелде. Аның артыннан ачыкларга киттем.

Тәүге баруымда: "Бер кыз ректор бүлмәсе янында намаз укыган”,-дигән мәгълүмат алып кайттым. Шуны сәбәп итеп, яулыкка бәйләнү киткән. Ә бу кыз башка урын булмагач, вакытында намазымны башкарырга тиешмен дип, укыгандыр инде...”Социаль мәгариф Академиясе”ндә булган бу хәл. "Февраль ае башыннан яулыклы кызларны уку йортына кертмәскә” дигән әмер дә кәгазьгә төшкән. Әлеге хәбәр "Мөслимә” иҗтимагый оешмасы кешеләренә – безнең яңагыбызга суккандай булды.

Тагын киттек ректор янына. Сөйләшү бик җитди булды. Нәтиҗәсе мондый: кызлар укуларын яулыктан дәвам итәчәкләр. Оешмабызның бергәләп мәхкәмәләргә йөргән активисткабыз Зөлфия Фәткуллина да яулыклыларны яклый торган документлар алып килгән иде.
Димәк, кызларыбыз Академиядә яулыкларын киеп укыячак, иншә Аллаһ!

Биредәге ректорның чыгышы белән татар зыялылары нәселеннән булуын ишетеп кайттым. Киләчәктә ул хакта да кызыксынырбыз әле, Аллаһы боерса.

Татарстан Диния нәзарәтеннән дә яулыклы кызларны яклауларын белдерделәр. Әмма яулык мәсьәләсе кабаттан әйләнеп каймасын иде инде.

Әлмира ҺӘДИЯ,
"Мөслимә” иҗтимагый оешмасы рәисе