Ярый әле килдек, диләр

Саба районы мәчетләрендә эшләүче 17 абыстай «Ярдәм» мәчетендә кунакта булды. Аларның остазбикәсе – Рәфидә Гафиятуллина. Ул элек укытучы булган, мәктәптә балалар укыткан. Бу төркемдә табибәләр, бухгалтерлар, укытучылар һәм башка күп төрле һөнәр ияләре бар.

Бу төркем моннан 6 ел элек мәчеткә ислам дине йолаларын өйрәнергә йөри башлаган. Аллага шөкер, хәзер үзләре Коръән укыйлар, хәтта Коръән хәтем кылалар, ягъни изге китапны тулысынча укып чыгалар. Әлеге мөслимәләрнең күбесе хатын-кыз мәетен озатканда абыстайлык вазифасын да башкара.

Сабадан килгән гүзәл затлар “Ярдәм” мәчетендә белем алучы күрмәүчеләрнең уку рәвеше белән дә таныштылар. Ә инде Башкортстаннан килгән күрмәүче Равия Рамазанованың “Минем дә күрәсем килмиме?” дигән шигырен тыңлагач, Саба мөслимәләренең күзләре дымланды, анда эре яшь бөртекләре күренде.

Әлмира ҺӘДИЯ, җәмәгать эшлеклесе