Ярдәмлеләр сабыйлар янында кунакта

Узган ялларда “ Ярдәм ” милли хәйрия фондының бер юнәлеше буларак, Казанда уңышлы эшләп килүче алкогольга һәм наркотикларга бәйле кешеләрне тернәкләндерү үзәге хезмәткәрләре Теләче районының Иске Җөри авылында урнашкан ятим балалар йортында булып, балаларның хәлләрен белеп, сөйләшеп аралашып, җыеп кына әйткәндә кунак булып кайттылар.

Шушы матур йортка, Мәликә ханымның җылы канаты астына җыелганнарына бер ел тулып килә әлеге ятимнәрнең. Җир йөзендәге иң матур сүз, иң җылы төшенчә булган “әни” сүзен саф татарча итеп “әнием” ,- дип дәшәләр алар аңарга. Сабый күңеленең сизгерлеге гасырлар белән тикшерелгән. Бөтен нәрсә сатылган шушы заманда да акчага сатып алып булмый балаларның мәхәббәтен.

Аңа лаек булу мөһим. Хәтта үзен якты дөньяга тудырган хатын-кызны да әлеге сүз белән атарга тел әйләнми кайвакыт. Ә Мәликә ханым үз әниләре мәхрүм иткән җылылыкка төреп, тиешле урында сөеп, кирәк чагында тиргәп, көйсезләнгәндә көйләп, зур бер гаиләнең хуҗабикәсе булып яши әлеге йортта. Тулы мәгънәсендә “әни” ул шушы ятимнәр өчен.

Шуңа күрә дә биредә һәрвакыт балаларның шат авазы яңгырап тора. Килгән кунакларны үзләренең концерт программалары белән сөендереп, тәмле ризыклы табын артында чәй белән сыйлап озатырга күнеккән инде алар. Җырларның да, шигырьләрнең дә әниләргә багышланганнарын сайлый алар.

“Ярдәм” фонды хезмәткәрләре дә балаларны үз күчтәнәчләре - бүләкләре белән куандырдылар.

Эльвира ИБРАҺИМОВА