Истанбул мөфтие Чуашстанда булды

Истанбул мөфтие, Төркиянең Милли университетының дин белеме деканы, доктор Рәхми Ярми беренче тапкыр Казан һәм Шәһри Болгар шәһәренә рәсми визит белән килде.
Болгардан соң Истанбул мөфтие Чуашстандагы татар-мөселман тормышы белән танышырга Шыгырдан авылына барды.

Чуашстанга кунак булып мөфти Рәхми Ярми белән Русиядәге Төркия илчесенең дин буенча киңәшчесе Фәхри Саглык та кайтты. Кунаклар Шыгырдандагы "Гөлстан" мәдрәсәсе белән танышты, шәкертләр, укытучылар белән очрашты.

Чуашстан һәм Мәскәү мөфтие Әлбир Крганов Рәхми Ярми белән Фәхри Саглыкны Шыгырданның "Өч сәхәбә" исемендәге Җәмигъ мәчетенә алып барды.

Истанбул мөфтиен "Өч сәхәбә" мәчетендә сакланган ике йөз еллык мимбәр шаккатырды, "Болгар иртәсе" картинасы кызыксындырды. Ахырда мөфти Чуашстан татарларына изге теләкләрен язып калдырды.

Истанбул мөфтиенә шәһәрдәге өч тарихи мәчет һәм Истанбулның 40 районы имамнары буйсына.

Александр Долгов