Дартста Илфат Гиниятуллин – чемпион

Кичә Казандагы “Ярдәм” Тернәкләндерү үзәгендә күрмәүче ир затлары һәм хатын-кызлар өчен дартс ярышлары булып узды. Ул спортның дартс төрен популярлаштыру, инвалидларның сәламәт яшәү рәвешен булдыру һәм иң яхшы спортчыларны билгеләү максатыннан оештырылды.

Дартс уенчыдан физик һәм рухи ныклык, кулларыңның калтырамавын таләп итүче спорт төре. Анда барлык спортчылар да бертигез шартларга куелды, ягъни бераз күрүчеләрнең күзләре капланды.

Уеннарда катнашкан гомуми 28 кеше арасында мәргәнлек сыйфатларын күрсәтеп, 5 мөмкинлектән 67 очко җыйган Илфат Гиниятуллин (ул Тәтеш районыннан килде) чемпион исемен яулады. Икенче урында – 38 очко белән Чечнядан Әмир Дукаев. Өченчедә исә Дагыстаннан Корбанмөхәммәт Кляев (21 очко).

Гүзәл затлар арасында Дагыстаннан килгән Әминә Кункуевага (44 очко) тиңнәр табылмады. Икенчедә – Ульяннан Рәхилә Мәүлетова (25 очко). Өченчедә – Ижаудан Сәкинә Садыйкова. Ул Рәхилә ханымга нибары 1 очкога калышып, өченче урын белән канәгатьләнде.

Шунысын да өстәп әйтергә кирәк: дартс уены күрмәүчеләргә бик ошады. Алар мондый ярышлар тагын да узсын иде дигән теләкләрен белдерде.