Чечня мөфтие Солтан Мирзаев вазифасыннан китте

Чечня мөселманнары Диния нәзарәте рәисе Солтан Мирзаев, сәламәтлеге какшау сәбәпле, вазифасыннан китте. Чечня мөфтие вазифаларын вакытлыча үтәүче булып, Мөхәммәд Хийтанаев билгеләнде.

«Кавказский узел» язганча, Солтан Мирзаев Чечня Диния нәзарәте рәисе итеп 2005 елның июнендә сайлана. Ә 2010 елдан гомеренә буена бу җөмһүриятнең мөфтие булып сайлана.

3 июньдә мөфтияттә республика башлыгы ярдәмчесе Адәм Җовтаханов катнашында киңәшмә булып уза. Анда ул Чечня мөфтиенең сәламәтлеге какшау сәбәпле, вазифадан азат итүләрен соравы хакында белдерүен әйткән.

2005 елда үзен Чечня мөфтие итеп сайлаганчыга хәтле Солтан Мирзаев 2002 елдан мөфтинең беренче урынбасары булып эшли. Чечняда Аслан Масхадов идарә иткән чорларда ул Ичкерия милли гвардияге имамы вазифасын үти. 2000 елда исә ул Әхмәт Кадыйров администрациясе башлыгының вакытлыча киңәшчесе иде.

Чечня мөфтиятеннән хәбәр итүләренчә, Мөхәммәд Хийтанаев ике ел буена Грозный каласы мөселманнары казые вазифасын башкара. Хийтанаев шулай ук Чечен башкаласы мэрының киәшчесе һәм республика мөфтие урынбасары да булып тора. Быелның гыйнвар аеннан ул Чечня мөселманнары Диния нәзарәте рәисенең беренче урынбасары итеп тә билгеләнә. Мөхәммәд Хийтанаев югары дини белемгә ия, ул Димәшктә Фәтх исемндәге Ислам дәүләт университетын тәмамлый.