Автомәйдан әйдәманын урлаганнар һәм җәзалаганнар

Автомәйданның әйдәманнарыннан берсе булган Дмитрий Булатов билгесез затлар тарафыннан урлана һәм мыскыл итүләр, җәзалаулардан соң, тоткынлыктан котыла. Хәзерге вакытта Булатов Киевтәге хастаханәдә дәвалана.

Болар хакында үзенең Фейсбуктагы сәхифәсендә Украина халык депутаты Анатолий Гриценко яза. "Әле генә Дмитрий Булатов белән сөйләштем. Иң мөһиме, ул исән! Бу барлык көннәрдә аны җәзалаганнар: кискәләгәннәр, типкәләгәннәр. Бөтен тәне авырта, киселгән колагыннанкан ага...”,-дип яза Гриценко. Булатов хәзерге вакытта Киевның "Борис” клиникасында дәвалану уза.

Булатов сүзләренчә, ул әлегә кадәр үзен кем һәм ни өчен урлаганнарын белми. Тик җинаятьчеләрнең "рус шивәсе белән сөйләшүләре” аның исендә калган. Урлаучылар аны каты гына җәзалаганнар: аяклары белән типкәләгәннәр, кулларын очлы әйберләр белән тишкәннәр, битен танымаслык хәлгә китергәннәр һәм колагының бер өлешен кискәннәр. Узган пәнҗешәмбедә аны машинадан карлы урманда төшереп калдырганнар. Ир заты сәгать буе барып, бер авылга килеп чыга. Андагы берәү, ниһаять, аңа ишек ача. Ул шуннан үзенең дусларына шалтырата, дип хәбәр итә "Интерфакс”.

Украинаның "Автомәйдан” каршылык күрсәтү әйдәманы Дмитрий Булатов билгесез затлар тарафыннан 22 гыйнварда урланган була һәм кичә, ягъни 30 гыйнварда Вишенко авылында табып алына.