Вәлиулла Якупов Самосыр зиратына җирләнде

Казанның Апанай мәчетендә имам-хатыйб, галим, мәгърифәтче, идеолог Вәлиулла Якупов белән хушлаштылар. Мөфтиятнең мәгариф бүлеге җитәкчесе Вәлиулла хәзрәтне кичә өе каршында атып үтерделәр.

Җеназада Вәлиулла хәзрәт Якуповның татар-мөселман милләте өчен эшләгән гамәлләре, ислам яңарышында зур роль уйнавы билгеләп узылды.

ТР мөфтиенең элеккеге урынбасары белән хушлашуга ТР Премер-министр урынбасары Әсгать Сәфәров, ТР Мәдәният министры Айрат Сибгатуллин, Татар конгрессы Башкарма Комитеты рәисе Ринат Закиров,элекке мөфти Госман Исхакый, Кол Шәриф имамы Рамил Юныс, Үзәк Дини идарә рәисе урынбасары, Мәскәү мөфтие урынбасары Әлбир Крганов, Мордовия мөфтие Фәһим Шәфиев - Татарстан һәм Россиянең дин әһелләре килде.

Дини оешмалар белән эшләү идарәсе башлыгы Марат Гатин Вәлиулла Якуповның олы эшләрен искә алды. Аны үтерүчеләрнең тиешле җәзаны алачагын белдерде. - Гомергә тыныч яшәгән Татарстанда мондый хәлләр булуы аптырашта калдырды. Алга таба имамнарга бердәм булырга кирәк. Юкса, соңгы вакытларда таркаулык нык сизелде -, диде Марат Гатин.

Чуашстан һәм Мәскәү мөфтие Әлбир Крганов Вәлиулла Якуповның 20 ел дәвамында милләт, дин өчен тырышып, миллионлаган китаплар басуын, йөзләгән хезмәтләр һәм китаплар язуын мактап искә алды. - Ул байлык җыймады,зур йортлар салмады. Аның бар байлыгы - үзе ремонт ясаткан Апанай мәчете, китаплары булды. Рамазан алдыннан мәгърифәтче кешене үтерү - мөселманнарның йөзенә төкерү булды-,диде Крганов.

Вәлиулла Якупов Татарстандагы имамнар арасында иң белемле, укымышлы дин әһеле саналды. Муллалар арасында беренче булып галим дәрәҗәсе алды.

Вәлиулла Якупов Самосыр зиратына җирләнде.

Тимер Сәгыйтов