Укулар атна ахырында башланыр, Аллаһы боерса

Казандагы "Сөләйман" мәчетендә урнашкан Күзләре күрмәүчеләрнең тернәкләндерү үзәгендә чираттагы курслар атна ахырында башланыр, мөгаен.
Әлеге курсларга 25 кеше килер, дип көтелә. Бүгенге көнгә бер дистәдән артык шәкерт Татарстан башкаласындагы гыйбадәтханәгә килде инде. Бу юлы иң зур төркем Дагыстаннан (4 кеше) һәм Пермьнән (5) булачак.
Тернәкләндерү үзәгенең уку-укыту бүлеге мөдире Мәликә ханым Гыйльметдинованың сүзләренчә, әлеге курсларда белем алучыларның күбесен яңалар тәшкил итәчәк һәм алар тулысынча күрмәүчеләрдән торачак.
Шәкертләр Брайль системасы буенча Коръән укырга, җирле шартларга яраклашып йөрергә өйрәнәчәк.
Сүз уңаеннан тагын шунысын әйтү мәслихәт: "Сөләйман" мәчетендә яшүсмер кызлар өчен костюм сатыла. Бәясе - 500 сум. Аннан кергән акча күзләре күрмәүчеләрне укыту, юл чыгымнарын каплау өчен тотылачак.