Әтнәгә Шүрәле килде

Әтнә районы Мәдәният йортында “Сөйкемле Шүрәле” бәйгесенең йомгаклау туры узды. Әлеге бәйгене гамәлгә куючылар: Татарстан Республикасы Мәдәният министрлыгы һәм Бөтендөнья татар конгрессы Башкарма комитеты, дип хәбәр итә татар конгрессы сайты.

Чарада Татарстанның барлык районнарыннан һәм Русиянең 6 төбәгеннән, аеруча Оренбург, Пенза, Әстерхан, Киров, Удмуртия, Пермь өлкәләреннән балалар катнашты. Әйтергә кирәк, бу бәйге агымдагы елның февраль аенда игълан ителгән иде һәм өченче тапкыр үткәрелде. Барлыгы 800 эш кабул ителде, шуның 180е 3 нче турга үтте.

Бүләкләү алдыннан бик матур итеп куелган Шүрәле спектакле күрсәтелде. Ә аннан соң спектакль персонаҗлары бүләкләнүчеләрне сәхнәгә чакырдылар. Барлыгы 56 балага бүләкләр тапшырылды, шуларнын 51е лауреат, 4 се дипломат.

Гран прига Лениногорскидан М.Х.Хәйретдинов исемендәге мәктәп укучылары Алинә Мөхәммәтҗанова, Ксения Кузнецова, катерина Сагирова, Яна Дмитриева лаек булды. Аларнын эшләре агачлар арасында балчыктан, керамикадан Шүрәле сүрәте ясалган панно иде. Бөтендөнья татар конгрессы Фонды директоры Сәрия Зиннәтова да җиңүчеләргә истәлекле бүләкләр тапшырды.

Кичәнең ахырында 2013 елда узачак 4нче бәйгегә конкурс игълан ителде.

Александр Долгов