Мөселманнар һәрвакыт белемгә омтылды

Бүген Казандагы Россия Ислам университетында ислам уку йортлары студентларының ислам хокукы, дин нигезләре һәм гарәп теле буенча V Бөтенроссия олимпиадасын ачу тантанасы үткәрелде.
Бу тантаналы чарада Татарстан Президентының дини берләшмәләр белән хезмәттәшлек идарәсе җитәкчесе Марат Гатин, Татарстан мөселманнары Диния нәзарәте рәисе, мөфти Илдус хәзрәт Фәизов, РИУ ректоры Рәфыйк Мөхәммәтшин, Кувәйт дәүләте Дин эшләре һәм вакыфлар министрлыгы хезмәткәрләре һәм Татарстан Мәгариф һәм фән министрлыгы җитәкчеләре, Мәскәү, башка төбәк кунаклары, шулай ук Татарстан ислам бергәлегенең дәрәҗәле вәкилләре катнашты.
Мөфти Илдус хәзрәт Фәизов олимпиада катнашучыларны котлады һәм уңышлар теләде. "Мөселманнар һәрвакыт белемгә омтылды. Сезнең монда җыелуыгыз бердәм рәвештә белемгә һәм Аллаһка якын булырга омтылуыгызны күрсәтә”, - дип билгеләп үтте Татарстан мөфтие.
Искәртеп узабыз, олимпиада 29-30 майда Россия Ислам университетында уза. Коръән факультеты мөгаллиме Рөстәм хәзрәт Иззетовның хәбәрчебезгә сөйләвенчә, әлеге олимпиадада Россия Федерациясенең 20 дән артык ислам уку йортыннан килгән студентлар катнаша.
Иртәгә, 30 майда олимпиадада җиңүчеләрне котлау тантанасы уздырылыр дип көтелә.