Мөфтият грантларны кемгә бирә?

Быел грантка дәгъва иткән 31 заявка Татарстан авыл җирлекләрендә республика мөфтиятенә караган дини оешмаларда эшләүче 18-35 яшьлек имамнардан һәм укытучылардан кергән. Әгерҗе, Әлмәт, Буа, Яшел Үзән, Кайбыч, Лаеш, Мөслим, Нурлат, Балык Бистәсе, Саба, Чирмешән, Чистай, Ютазы районнары, Казанның Вахитов һәм Идел буе районнары имамнары бигрәк тә актив булган. Грантка дәгъва итүче яшь имамнар сүзләренчә, мондый грант алар өчен бик зур ярдәм булып тора, иң кискен мәсьәләләрне хәл итәргә мөмкинлек бирә.

Татарстан мөфтиенең беренче урынбасары Рөстәм хәзрәт Батров, Татарстан мөфтие урынбасары Рөстәм хәзрәт Хәйруллин, нәзарәтнең аппарат җитәкчесе Рафис Шаһвәлиевтән торган комиссия лаеклыларны сайлап алды. Егерме алты заявка буенча уңай карар кабул ителде.

Өлкәнрәк яшьтәге дин әһелләре дә, грантта катнашып, акчаны фәнни-тикшеренү һәм рухи-агарту проектларына ала ала.

Быел мөфтият комиссиясе тагын бер төркем заявкаларны караячак, дип көтелә. Аларның саны күпме булачагы имамнарның активлыгыннан тора. Узган ел авыл җирлегендә эшләүче туксанга якын белгеч грант алган иде, дип хәбәр итә мөфтиятнең матбугат хезмәте.