Казыйлар шурасы җыелышы үткәрелде

Кичә Татарстан мөселманнары Диния нәзарәтендә казыйлар шурасының чираттагы җыелышы үткәрелде.

Җыелышта мөфти Камил хәзрәт Сәмигуллин, баш казый Җәлил хәзрәт Фазлыев, республиканың төрле төбәк казыйлары катнашты. Мөфти Камил хәзрәт казыйларга дини эшчәнлек алып баруга бәйле теләк-тәкъдимнәрен җиткерде. Аерым алганда ул, кайбер дини мәсьәләләрне, әйтик намаз вакытларын, бәйрәм көннәрен билгеләү һәм төрле фикерләр уяткан башка төр сорауларны уртага салып сөйләшү мөһимлеген ассызыклады, моның өчен Россия күләмендә казыйлар, билгеле дин белгечләре очрашуын үткәрү кирәклеген дә әйтте.

Шулай ук мөфти Татарстанда мәүлид бәйрәмен уздыруга әзерлек чараларына тукталды. 2014 елда мәүлид кичәсе якшәмбе көнгә – 12 гыйнварга, мәүлид бәйрәме көне 13 гыйнварга туры килә. ТР МДН мөбәрәк мәүлид бәйрәмен – Пәйгамбәребез Мөхәммәд (сгв) туган көнен бабаларыбыз үткәргән үрнәктә, күркәм бер дини чара итеп, үз җирлегебезгә хас рухта уздыру ниятендә тора.

Казыйлар агымдагы эш-гамәлләрен һәм ниятләрен дә барладылар. Халыктан килеп ирешкән талак, гаилә кору кебек мәсьәләләргә кагылышлы сорауларны тикшерделәр дип хәбәр итте Диния нәзарәте матбугат хезмәте.