Казанда төрек киносы көннәре уздырыла

18-24 майда "Казанда төрек киносы көннәре” фестивале кысаларында, ”Мир” кинотеатры экраны төрек кинематографистлары әсәрләренә бирелә. Фестиваль программасында каралганча, Казан һәм башкала кунаклары игътибарына хәзерге заман фильмнары тәкъдим ителә: "Биш вакыт”, "Ул тәсбихләр түгел”, "Моммо чудище”, "Мин "ноль” дип әйткәч, "Бал”, "Минем әти һәм минем улым”, "Эшрефпашалда яшәүчеләр”, "Акылдан язма”, "Ак фәрештә”. Аларның күпчелеге кинофестиваль конкурсларында җиңү яулаган икәнен дә билгеләп үтү кирәк.

Шулай ук, Татарстан Мәдәният министрлыгыннан алынган белешмә буенча, Төркия мәдәнияте белән кызыксынучылар, аны тирәнрәк аңларга теләүчеләр өчен иҗади очрашулар оештырыла, шул исәптән режиссерлар белән дә, фикер алышулар һәм осталык дәресләре уздыру күздә тотыла. Фестиваль исә, Төркия Республикасы Мәдәният министрлыгы инициативасы белән, Төркия Республикасының Казандагы Генераль Консуллыгы тарафыннан һәм Татарстан Республикасы Мәдәният министрлыгы, "Татаркино” учреждениесе ярдәме белән үткәрелә.
Чыганак: "Татар-информ"