Казанда мөселман зиратын яклап пикет узды

Казан янындагы мөселман зиратын саклап калып булырмы? Казанның Совет районы прокуратурасы Вахитов районы судына мөселман зираты эшчәнлеген туктату турында гариза биргән. "Азатлык" татар яшьләре берлеге Мәрҗани мәчете карамагындагы зиратны яклап пикетка чыкты.

Әлеге зират тирәсендә бәхәс инде берничә ай бара. Эш шунда – Казан мэриясенең шәһәр төзелеше идарәсе башлыгы Альберт Салихов әтисенең кабер ташына рәсем куярга теләде, ләкин зират җитәкчелеге моңа рөхсәт бирмәде. Бу турыда матбугат чаралары күп язды. Хәзер кабер ташы тирәсендәге гауга мөселман зиратын яптыруга китерергә мөмкин. Чөнки чиновник Салихов әтисенең кабер ташына барыбер рәсем куйдырырга тели. Ә бу дин кануннары буенча рөхсәт ителми.

Казан мөхтәсибе Мансур Җәләлетдин фикеренчә, зиратны ябуны күз алдына да китереп булмый. Чөнки кабер өчен җир алып куйган кешеләр күп.

Пикетта Казанның 10лап имамы, шәкертләр катнашты. Гомумән, пикетка 100дән артык кеше килгән иде. Алар зиратны япмауны һәм Салиховны эштән алуны таләп итә.

Александр Долгов