Фәрит Мифтахов Актанышта сәфәрдә булды

Татарстан Дәүләт Советы депутаты, Татар конгрессының Казан бүлеге җитәкчесе Фәрит Мифтахов Актаныш районында сәфәрдә булды. Фәрит Мифтахов Дәүләт Советы күрсәтмәсе белән Актанышта икенче ел эшләп килгән гуманитар татар гимназиясе укучылары белән очрашты. Әлеге гимназия президент күрсәтмәсе белән татар элитасын тәрбияләү өчен ачылды.

Гуманитар татар гимназиясендә Татарстан, Башкортстан, Свердловск, Оренбург, Красноярск балалары белем ала. Укучылар, мәктәп җитәкчелеге Фәрит Мифтахов белән очрашуда милли гореф-гадәтләр турында сөйләште. Фәрит Мифтахов укучыларны милли һәм дини традицияләр белән таныштырды, аларны бергә алып барырга өндәде.

Таҗикстаннан укырга килгән Элина Фәрит Мифтаховтан Дүшәнбе Сабантуена Салаватны чакыруын сорады. Мифтахов бу турыда Салаватка әйтәсен белдерде.

Очрашудан соң, Фәрит Мифтахов Конгрессның Актаныш бүлеге җитәкчесе Нурулла Нурлыев, казый Руслан Мортазин белән очрашты. Традицион исламны дин белән милләтне бергә алып барганда гына үстереп булачагын аңлатты.

Район хакимияте башлыгы вазыйфаларын башкаручы Фаил Камаев Фәрит Мифтаховка Актанышка эш сәфәре ясаган өчен рәхмәтен ирештерде.

Сәфәр Шәймиев музеена бару белән тәмамланды.

Саша Долгов