Буа мөхтәсибәтендә - спартакиада

28 май көнне бик матур аланда Буа мөхтәсибәте кубогына, Балаларны яклау көне уңаеннан, изге Рамазан ае башлануын каршы алып, спартакиада булып үтте. Анда Буа районыннан алты мәчет мөселманнары һәм Иске Суыксу авылы мәхәлләләренә йөрүче яшь һәм урта буын көч сынашты.

Программада футбол, кул көрәштерү, аркан тартышу, гер күтәрү балаларның уеннары белән аралаштырылып барды. Нәтиҗәләр шул:

1 урынны - Иске Суыксу авылы мәчете мәхәлләсе,

2 урынны - “Тәкъва” белән “Госман” мәчетләре,

3 урынны “Хаҗилар мәчете” мәхәлләсе алды.

Дини Сабантуй Буа мөхтәсибәте әзерләгән мул табын артында нәсыйхәтләр, киңәшләр белән тәмамланды. Һәрбер катнашкан, булышкан җәмәгатькә мөхтәсибәт олы рәхмәтен белдерә. Дини Сабантуйлары һәр елны уздырылачак икәненә зур өметләр баглап кала дип хәбәр итте Буа мөхтәсибәте.