Владимир Чамов: «Ливия президенты Каддафи нәрсә эшләгәнен бик яхшы аңлый»

«Ливия президенты Каддафи нәрсә эшләгәнен бик яхшы аңлый. Соңгы күре­шүебездә ул үзен бик тыныч тотты», — дип сөйләгән журналистларга Россиянең бу илдәге элеккеге илчесе Владимир Чамов. Ул яңа гына Мәскәүгә әйләнеп кайткан.

Аның әйтүенчә, Ливиядәге вакыйгаларның матбугатта чагылышы дөреслеккә туры килми. «Сез халыкны нинди изү турында сөйлисез? — дип гаҗәп­ләнгән ул. — Ливиядә яшәүчеләргә торак төзү өчен егерме елга процентсыз кредит бирелә иде, бер литр ягулык бәясе безнең акча белән өч сум чамасы, ә азык-төлек берни дә тормый диярлек. Бүген бу илне юкка чыгардылар», дип хәбәр итә «Ватаным татарстан».

Чамов фикеренчә, Каддафи нәрсә эшләгәнен бик яхшы аңлый. «Бу кеше 70 нче еллар ахырындагы Ливия революциясе вакытында Америка хәрби­ләрен Ливия ярларыннан, Улусфилд хәрби базасыннан куып чыгарганын онытмагыз. Алар бүгенгә кадәр шуны гафу итә алмый», — дигән элеккеге илче. Ливиядән соң чират Сүриягә, аннары башка Азия дәүләт­ләренә дә җитәчәк, дип фаразлаган Чамов. Ә Каддафи режимы тагын өч-дүрт айга чыдаячак. «Азык-төлек запасы шуңа кадәр җитә. Хәзер Ливиягә һава һәм су юлы ябык», — дип аңлаткан Чамов.