Дубайда Мөхәммәд Пәйгамбәрнең тормышына багышланган иң авыр китап күрсәтелде

Дубайда Мөхәммәд Пәйгамбәрнең тормышына багышланган 1 тонна авырлыктагы китап тәкъдим ителде. Аның биеклеге — 5 метр, киңлеге — 4 метр. Мәдәни һәм дини кыйммәткә ия булган әлеге җыентык Гиннесның Рекордлар китабына кертелгән.

Дөньядагы иң зур ислам китабын Берләшкән Гарәп Әмирлекләре финанс министры һәм Дубай хакиме урынбасары, шәех Һәмдан бин Рәшит Әл-Мәктүм Галиҗәнабләре тәкъдим кылды.

Әлеге тантанада илнең җитәкчеләре, дипломатлар, эшкуарлар, галимнәр һәм ММЧ вәкилләре катнашты. «Бу — Мөхәммәд» дигән китапта Пәйгамбәрнең тормыш юлы бәян ителә һәм әлеге диннең халыкара мәйданда тоткан урыны турында сөйләнелә. Китапның максаты — теләге булган һәркемне ислам дине һәм мөселманнар тормышы белән якыннан таныштыру.

Шәех Һәмдан инде 50 мең китапны бастырып чыгаруга заказ биргән. Алар төрле оешмаларга, шул исәптән, чит төбәкләрдәге җәмгыятьләргә җибәреләчәк.