«Сөләйман» мәчетендә хәйрия мәҗлесе үткәрелде

Җомга намазыннан соң, Казандагы «Сөләйман» мәчетендә Мәүлет аена багышланган хәйрия мәҗлесе уздырылды. Әлеге чарада Тернәкләндерү үзәгендәге айлык курсларга белем алырга килгән күзләре күрмәүче шәкертләр, тәртипләрендә тайпылыш булган балалар, шулай ук мәхәллә халкы катнашты.

Аш мәҗлесе вакытында сөекле Пәйгамбәребезнең (с. г. в.) тормышы турында сөйләделәр, мөнәҗәтләр көйләделәр, Пәйгамбәребезнең рухына багышлап дога кылдылар, салаватлар әйттеләр.

Мәүлет аена багышланган мондый чаралар үткәрү «Сөләйман» мәчетендә күркәм бер йолага әйләнде. Биредә шулай ук күзләре күрмәүче хатын-кызларга да Пәйгамбәребезнең тормышына (сира), дини эшчәнлегенә багышланган дәресләр, башка төрле программалар да әзерләнгән.