«Сөембикә энеләре һәм сеңелләре» бәйгесе узачак

6 апрельдә Казандагы «Мәрҗани» мәчетендә балалар һәм яшүсмерләр өчен «Сөембикә энеләре һәм сеңелләре» дигән Бөтенроссия конкурсы үтәчәк.

Бәйгене оештыручы «Мөслимә» иҗтимагый оешмасы рәисе Әлмира апа Әдиатуллина сүзләренчә, конкурста катнашучылар Коръән һәм ислам нигезләрен белү буенча ярышачак.

Әлеге бәйгене үткәрү күркәм гадәткә әйләнде. Быел ул 15 нче тапкыр уздырыла. Анда 4тән 18 яшькәчә балалар катнашачак.

Әлмира апаның сүзләренчә, бу конкурс яшүсмерләрне әхлакый яктан тәрбияләү максаты белән оештырыла. «Мондый бәйгеләр балаларның әхлакый мөмкинлеген ныгытуга ярдәм итә һәм лаеклы алмаш тәрбияләүгә булыша»,-ди Әлмира апа. Ул әлеге чараны оештыруда булышкан һәркемгә үзенең олуг рәхмәтләрен белдерде.