Казан шәһәренең 7 нче лицей-интернатында гаиләдә татар телен саклап калуга багышланган кичә уза

Биредә белем алучы оныклары янына шагыйрә Эльмира Шәрифуллина белән Балтачта яшәп иҗат итүче шагыйрь Гарифҗан Мөхәммәтшин да киләчәк.

Иртәгә — 3 февральдә Казан шәһәренең 7 нче лицей-интернатында Туган телләр айлыгы кысаларында, «Татар гаиләсе» фонды белән берлектә «Ни газизрәк бу Ватанмы? Ах, туган каумем газиз» дип исемләнгән чара уздырыла. Лицей-интернатның уку-укыту эшләре буенча директоры урынбасары Нурия Шәрифҗанова хәбәр иткәнчә, әлеге кичә татар гаиләсендә туган телне саклап калу мәсьәләсенә багышлана.

Очрашуга әдип-депутатлар Туфан Миңнуллин, Разил Вәлиев чакырылган. Шулай ук биредә белем алучы оныклары янына шагыйрә Эльмира Шәрифуллина белән Балтачта яшәп иҗат итүче Гарифҗан Мөхәммәтшин да киләчәк. Аларның гаиләләре мисалында туган телне гаиләдә саклап калу турында сөйләшү алып барылачак. Шулай ук гаиләдә алынган күнекмәләрне мәктәпкә килгәч тә югалтмау мәсьәләләре каралачак.

Очрашуга 7 нче лицей-интернатын тәмамлап чыккан егетләр дә чакырыла. Алар үз тәҗрибәсе белән уртаклашачак дип хәбәр итте «Татар-информ».