Казандагы «Сөләйман» мәчетендә — Мәүлет ае чаралары

Мәүлет ае (Рабигүл-әүвәл) җитү белән сөекле Пәйгамбәребез Мөхәммәдкә (с. г. в.) багышланган чаралар үткәрү күркәм бер гореф-гадәткә әйләнде.

Бу айда Мөхәммәд Пәйгамбәрнең тормышы, дини эшчәнлеге турында лекцияләр укыла, викториналар, хәйрия ашлары үткәрелә. Болардан тыш, күзләре күрмәүчеләр өчен оештырылган айлык курсларда белем алучы шәкертләргә көн саен Мөхәммәд Пәйгамбәр хакында вәгазь сөйләнә.

Тәртипләрендә тайпылыш булган балаларның махсус мәктәбендә Пәйгамбәрнең тормышы (сира), аңа салават әйтү хакында көн саен дәресләр үткәрелә, мөнәҗәтләр өйрәтелә. Җомга көннәрендә исә Пәйгамбәребезнең туган көненә багышлап хәйрия ашлары уздырыла, Мөхәммәд турында вәгазь сөйләнелә, Коръән укыла. Аларда мәхәллә халкы, күзләре күрмәүче шәкертләр һәм махсус мәктәп балалары катнашыр, дип көтелә.