Салкыннан да куркып тормадылар

Казандагы «Сөләйман» мәчетендә урнашкан Сукырларны Тернәкләндерү үзәгендә чираттагы курслар башланды. Әлеге үзәкнең җитәкчесе Мәликә ханым Гыйльметдинованың әйтүенчә, бу юлы биредә 23 хатын-кыз Брайльчә Коръәнне укырга дип килгән. Кыргызстаннан тагын 3 кешенең килүе көтелә. Бүгенге көндә изге китапны укырга өйрәнергә теләк белдерүчеләрнең саны бер урынга 15 кешегә җиткән.

Мәликә ханымның сөйләвенчә, бүгенге курсларга Пермь өлкәсенең Барда районыннан, Башкортстан, Оренбургтан, Татарстанның Түбән Кама, Чаллы, Әлмәт, Алабуга калаларыннан, Кайбыч, Балык Бистәсе районнарыннан һәм, әлбәттә, Казанның төрле төбәкләреннән күзләре күрмәүчеләр җыелган.

«Бу курслар инде декабрь аенда ук үткәрелергә тиеш иде, әмма матди хәлебез начар булганлыктан, аны гыйнварга күчерергә мәҗбүр булдык. Күзләре күрмәүчеләр без бу курсларны ябарбыз дип шикләнделәр. Ә алар үзләре бу араларда башланган салкын көннәрдән дә куркып тормадылар, тагын да күбрәк булып килделәр. Безгә хәтта алар өчен 5 раскладушка алып куярга туры килде. Аларны безгә алып килгән өчен Аллаһының рәхмәтләре яусын мөселман кардәшләребезгә»,-диде Мәликә ханым Гыйльметдинова.

Хаҗип ӘХМӘТША