«Алтын алка»ның финал уеннары Казанда 19-27 гыйнвар көннәрендә уза

Уеннарда 154 команда катнаша.

«Татар-информ»нан алынган мәгълүматларга караганда, яшь хоккейчыларның «Алтын алка» клубы призына финал уеннары Казанда 19-27 гыйнвар көннәрендә уза. Кичә бу хакта Казан мэриясендә узган «эшлекле дүшәмбе» киңәшмәсендә физик культура һәм спорт комитеты рәисе Илгиз Фәхриев хәбәр итте.

Ярышларның нигезләмәсендә күрсәтелгәнчә, Казан шәһәренең 7 районында 25 декабрьдән 14 гыйнварга кадәр өч яшь категориясе буенча бөтенроссия ярышларының беренче этап уеннары уза. Анда мәктәпләрдә һәм яшүсмерләр клубларында шөгыльләнүче 154 команда уенчылары катнаша.

Илгиз Фәхриев аңлатып үткәнчә, районнар дәрәҗәсендәге финал уеннарыннан соң, 19-27 гыйнвар көннәрендә шәһәр күләмендә уеннар уза. Һәр яшь төркемендә 1-2 урыннарны алучылар 31 гыйнвардан 17 февральгә кадәр республика турнирында катнаша.

Ул үз чыгышында шулай ук Казанда яңа 74 пластик хоккей тартмалары урнаштырылганлыгын билгеләп үтте.