Барлык диннәрнең храмы туристларны җәлеп итә

Яңа елдагы каникуллар вакытында Казанның Иске Аракчино бистәсендәге храм Татарстан башкаласына килгән кунакларда зур кызыксыну уята.

Исегезгә төшерәбез: Галәм храмы дип аталган бинада мөселманнарның ярымаен, православиенең тәресен, давид йолдызын да күрергә мөмкин. Биредә мәчет, чиркәү, синагога кришначыларның бүлмәләре дә бер-берсенә күршедә генә урнашкан.

Монда дини гыйбадәтләр кылынмый. «Бу храм дини бина түгел. Ул хакыйкать йорты, шул ук вакытта рухи берләшүнең халыкара мәдәният үзәге буларак уйлап табылды»,-дип ассызыклады әлеге корылманы инде 10 ел буена төзүче скульптор- монументалист Илдар Ханов.

Илдар әфәнденең сөйләвенчә, быелгы Яңа ел бәйрәме вакытында гына да биредәге бинаны карарга автобусларда Сызрань, Санкт-Петербург, Мәскәү, Түбән Новгородтан кешеләр килгән. Шулай ук анда Япония, Канада, Һиндстан, Израильдән төркемнәр булып киткән.