Татарстанның антинаркотик комиссиясе утырышына биш мәсьәлә чыгарыла

Республикада киләсе елга ведомствоара антинаркотик чаралар планын, республика муниципаль берәмлекләрендә антинаркотик комиссияләр турындагы типлаштырылган положениеләрен раслау турындагы мәсьәләләр ябык режимда карала

Бүген ТР Министрлар Кабинетында, муниципаль районнар белән берлектә видеоконференция режимында, Татарстанның антинаркотик комиссиясе утырышы була.

ТР Премьер-министры урынбасары Зилә Вәлиева рәислегендә барасы әлеге чарага 5 мәсьәлә чыгарыла, дип хәбәр итә оештыручылар исеменнән Россия наркотиклар әйләнешен контрольда тоту буенча федераль хезмәтенең ТР буенча идарәсе.

Аерым алганда, Чистай районында наркотикларның законсыз әйләнешенә каршы тору һәм халыкны наркотизацияләүне профилактикалау буенча эш барышы, укучы яшьләр һәм хәрби хезмәткә алыну яшендәгеләрне быел наркотик һәм психотроп матдәләр куллану-кулланмаулары мәсьәләсендә профилактик максатларда уздырылган медицина тикшерүләре нәтиҗәләре турында хисап ясала. Шулай ук республика антинаркотик комиссиясенең быелгы эшчәнлеге йомгаклары һәм киләсе елга утырышлар планы игълан ителә. Татарстанда 2012 елга ведомствоара антинаркотик чаралар планын, республика муниципаль берәмлекләрендә антинаркотик комиссияләр турындагы типлаштырылган положениеләрен раслау турындагы калган 2 мәсьәлә исә ябык режимда каралачак, дип хәбәр итә «Татар-информ»ның матбугат агентлыгы.