Питрәчтә “Изгелек эшләргә ашыгыгыз!” акциясе тәмамланды

Аны «Кайгырту» халыкка социаль хезмәт күрсәтү үзәгендә эшләүче «Яшь буын» волонтерлар отряды игълан иткән иде

«Татар-информ»нан алынган мәгълүматларга караганда, Питрәч муниципаль районында «Изгелек эшләргә ашыгыгыз!» акциясе төгәлләнде. Аны «Кайгырту» халыкка социаль хезмәт күрсәтү үзәгендә эшләүче «Яшь буын» волонтерлар отряды игълан иткән иде, дип хәбәр итә «Алга» газетасы.

Әлеге акция инвалидлар ункөнлегенә багышланган. Өч атна дәвамында яшь волонтерлар 1600 килограммнан артык макулатура җыйган. Акциядә район китапханәсе, редакция, социаль яклау идарәсе, почта, 2 нче мәктәп, район үзәгенең мәктәпкәчә балалар учреждениеләре һәм башка оешмалар актив катнашкан.

Тупланган чаралар мөмкинлекләре чикләнгән балаларга уенчыклар, тәм-том һәм белемне арттыра торган уеннар алуга тотылачак.