"Рәйхан" кафесында физик мөмкинлеләре чикле булган балаларга бәйрәм чарасы оештырылды

Үткән шимбәдә «Рәйхан» кафесында «Апрель» тернәкләндерү үзәгендәге балалар, аларның әти-әниләре һәм «Сөләйман» мәчетендәге күрмәүчеләр өчен эшләгән тернәкләндерү Үзәгендәгеләргә бәйрәм чарасы оештырылды. Оештыручылары: «Три кита» компаниясе директоры Раилә Сабирова булышлыгында «Ярдәм» Милли хәйрия фонды иде. Кунакларга ресторан тәм-томнары һәм Татарстанның халык артисты Руслан Бахадур, Татарстанның атказанган артисты Илшат Вәлиев, ислам мөнәҗәтләрен башкаручы, РИУ укытучысы Ильяс Халиков катнашында концерт программасы тәкъдим ителде.

«Чарабызның максаты кешеләр җыю гына түгел, ә аларга аралашу, ял итү өчен шартлар тудыру, — ди чараның җитәкчесе, — аларның үзләрендә башка кешеләрнең ярдәмен, кайгыртуын тоюлары мөһим. Чөнки кайберләре айлар буена йортларыннан чыкмый.» «Ярдәм» Милли хәйрия фонды җитәкчесе Илһам Исмәгыйлев белдерүенчә: «Фонд булдыра алганча еш мондый чаралар үткәрергә тырыша. Бу балаларга әйләнә-тирәдәгеләрнең йөрәк җылысын тоеп яшәү, үзләренең ялгыз түгеллекләрен аңлау бик тә мөһим. Сабыйларның безнең очрашулардан киткәндә күзләре бәхеттән балкый. Ә бу безнең өчен иң зур бүләк булып тора».

«Кешеләрнең читләр проблемасына битараф булмавын күрү күңелле, — ди бер баланың әнисе — Наилә апа, — балаларыбызга мондый мөмкинлек бирүләренә, һәрдаим булышып торуларына чын күңелдән шатланабыз. Безнең сабыйларга мондый көннәр иң бәхетле көннәрнең берсе булып тора!»