Казанда “Бәхетле хатын-кызлар” Татарстан актив хатын-кызлар очрашуы үтә

Татарстанның «Бәхетле хатын-кызлар» актив хатын-кызлары очрашуы Казанда 22 декабрь көнне үтә. Оештыручылары: «Татарстан мөслимәләре Союзы».

«Татар-информ» мәгълүмат агентлыгы хәбәрчесенә Татарстан мөслимәләре Союзы рәисе Наилә Җиһаншина хәбәр иткәнчә, очрашуда катнашучыларны кызыклы программа көтә. Монда «Мөслимәләр Союзы — Татарстан халкы хезмәтенә» дип исемләнгән оешманың иҗтимагый-мөһим проектлары тәкъдим ителәчәк, җөмһүриятебез дизайнерларының милли һәм дини киемнәр коллекциясе күрсәтеләчәк, зәвыклы кием дизайнерлары әйдаманнарыннан (Надя Әюпова, Ләйсән Хаҗиева, Факия Сабирҗанова) яулык бәйләү буенча мастер класслар булачак. Чараны оештыручылар фотокүргәзмә, «Swarovski» ташларыннан ясалган шамаилләр тәкъдим итүне дә караган.

Шулай ук бу көндә әле беренче адымнарын ясаучы һәм үз эшләренең осталары булган милли һәм дини җырлар башкаручыларның чыгышы белән дә хозурланып булачак. Алар: Асаф Вәлиев, Алмаз Мәннапов, Ильяс Халиков, Газинур, Алинә Булатова һ.б.

Чараның кунакларын күңелле бүләкләр һәм сюрпризлар көтә. Тамашачылар өчен викторина «Иң хикмәтле» татар халкы кыйммәтләрен һәм йолаларын саклау залында үтә.