“Сәламәт Бөгелмә” түгәрәк өстәле

2011 елның 14 декабрендә Бөгелмә шәһәренең Үзәк мәчетендә яшьләр оешмалары, администрация вәкилләре һәм хакмият структуралары арасында «Сәламәт Бөгелмә» исеме астында түгәрәк өстәл үтте. Әлеге чараны Бөгелмә шәһәрендәге «Алтын урта» яшьләр оешмасының яшьләр филиалы оештырган. Түгәрәк өстәлдә төрле яшьтәге, төрле өлкәдә эшләүчеләр катнашты, барысын да бер максат — Бөгелмәлеләрне алкоголизм һәм наркомания кебек афәтләрдән чистарту — берләштерде.

Түгәрәк өстәл барышында кызыклы гына чыгышлар ясалды, уку-укыту, тәрбия, әхлак кебек мөһим әйберләргә басым ясалды. Шулай ук яшьләр арасындагы җинаять эшләренең статистикасы да аерым каралып үтте. Түгәрәк өстәл ахырында шәһәрдә, районда яшьләр өчен җитәрлек ял итү урыннары, спорт комплекслары оештырырга кирәк дигән нәтиҗәгә килделәр, дип хәбәр итә Диния нәзарәтенең матбугат хезмәте.