Кыргызстан мөфтие кәләшләрне урлаучыларны җәзага тартырга чакыра

Кыргызстанның Югары мөфтие Чубак ажы Җәлилов, илдә кәләшләрне урлау белән бәйле хәлләрне шәрехләп, мондый гамәлләр кылучыларны җәзага тартырга кирәген белдерде, дип хәбәр итә «Knews.Kg».

«Ислам кануннары буенча, хайван урлаган өчен угърының кулын кисәләр, ә кешене урлаган өчен җәза катырак булырга тиеш. Минем көчемнән килсә, кәләшләрне урлаучыларга үлем җәзасы бирер идем. Кешене урлау — бу аның хокукларын бозу, хөрмәт итмәү. Исламда кәләш урлаган өчен җәза күрсәтелмәгән. Җирле имамнар мондый «кияү»ләрне җәзага тартырга тиеш», — дип җиткерә мөфти сүзләрен интернет-басма.

Кыргызстан мөселманнарының башлыгы, хәзерге вакытта җөмһүриятнең имамнары тарафыннан яшьләр арасында агарту-аңлату эшләре алып барыла. Аларга ислам нигезләре белән беррәттән, гаилә төзү кагыйдәләре дә аңлатыла. Яшь егетләргә кәләш урлау ислам буенча дөрес түгеллеген төшендерәләр, дип хәбәр итә Ислам в СНГ.