Татарстанның Министрлар кабинетындагылар җөмһүриятебездә әфьюн торышы хакында сөйләште

2011 елның 8 ноябрендә әфьюнга каршы комитет рәисе, Рәсәй буенча әфьюн әйләнешен контрольдә тоту федераль хезмәте директоры Виктор Иванов Татарстанга килеп, «Әфьюнга каршы сәясәт Стратегиясен тормышка ашыру» мәсьәләсе буенча киңәшмә үткәрде.

Катнашучылар республикабызда әфьюн торышы һәм аның законсыз рәвештә әйләнеше, әфьюнга бәйле булучыларга социаль ярдәм күрсәтү, яшьләрнең әфьюнга каршы көрәштә роль уйнаулары турында сөйләште.

Иң төп проблемаларның берсе булып «даруханәләрдәге әфьюн»ның югары үсеш алуы тора. Хокук саклау органнары тарафыннан әйләнештән алынган дезоморфинның саны да соңгы ике елда уннарча тапкырга арткан. Кайбер төбәкләрдә бу аеруча да киң таралган.

Киңәшмәдә Татарстан Илбашы Рөстәм Миңнеханов, премьер-министр Илдар Халиков, Рәсәй буенча әфьюн әйләнешен контрольдә тоту федераль хезмәте директоры урынбасары Михаил Кийко, Рәсәйнең Татарстанда әфьюн әйләнешен конторльдә тоту федераль хезмәте идарәсе җитәкчесе Фаяз Шабаев, Татарстан республикасы премьер-министры урынбасары Зилә Вәлиева, Татарстанда министрлар һәм идарәләр җитәкчеләре, Татарстан Диния нәзарәте рәисе Илдус хәзрәт Фәйзов, иҗтимагый һәм сәяси оешма вәкилләре катнашты, дип хәбәр итә Диния нәзарәтенең матбугат хезмәте.