Майкл Джексонның үлемендә табибы гаепләнә

Кичә, 7 ноябрьдә булып узган мәхкәмә утырышыннан соң, дөньякүләм танылган музыкант Майкл Джексонның шәхси табибы Конрад Мюррейга «алдан уйлап эшләнмәгән үлемдә гаепле» дигән карар чыгарылды һәм ул суд залында ук кулга алынды. Поп-корольнең соңгы көннәренә кадәр янында булган табиб Конрад хәзерге вакытта 29 ноябрьдә узачак соңгы судны төрмәдә көтеп үткәрәчәк. Инде аны төрмәдән акча түләп тә (залог) чыгармаячаклар.

Табибка мондый карар Лос-Анжелеста кичә суд залында чыгарылды. Судта рәислек кылган Майкл Пастор әлеге утырыш хакында: «Мондый карар бертавыштан кабул ителде һәм аңа шикаять белдерү мөмкин түгел», — дигән.

Бу эшне карау Лос-Анжелес округының Югары судында 6 айдан да артык дәвам иткән. 12 утырышчыдан торган коллегия бердәм рәвештә табиб гаепле дигән нәтиҗәгә килгән. Хәзер исә доктор Конрад Мюррейны 4 ел төрмә көтә. Моннан тыш, аның табиблык кылу лицензиясе дә алыначак.

Язма «Яндекс.ру»дагы хәбәрләргә нигезләнеп эшләнде