Гаеттән трансляцияне «Татарстан — Яңа Гасыр» каналы аша Казанның "Мәрҗани" мәчетеннән күрсәт

Трансляция иртәнге сәгать тугыз тулырга ун минутта башлана.

Быел 6 ноябрьдә мөселманнар көтеп алган бәйрәм — Корбан гаетеннән трансляцияне «Татарстан — Яңа Гасыр» каналы аша Казанның «Мәрҗани» мәчетеннән күрсәтәчәкләр. Трансляция иртәнге сәгать тугыз тулырга ун минутта башлана.

Бәйрәм вәгазен ТР мөселманнары Диния нәзарәте рәисе, мөфти Илдус хәзрәт Фәизов иртәнге сәгать тугызда сөйләячәк. Корбан гаете намазы — унынчы яртыда.

Традиция буенча трансляция вакытында «Нәсыйхәт» тапшыруын алып баручы Ләйсирә Фазлыева — татар телендә һәм ТР мөселманнары Диния нәзарәтенең Голәмәләр советы рәисе Рөстәм Батров рус телендә аңлатмалар биреп барачак. Трансляциянең режиссеры — Рифат хаҗи Йосыпов.

Ләйсирә Фазлыева сүзләренә караганда, «Мәрҗани» мәчетеннән трансляция вакытында 8 камера эшләячәк. Шул исәптән, берсе манарага куелачак. Камералар 5 ноябрь көнне урнаштырылыр дип көтелә.»Халыкка бәйрәм рухын җиткерергә тырышачакбыз», — дигән Л.Фазлыева «Татар-информ» корреспондентына.