Татарстан башкаласында «Мультимәдәни дөньяда Ислам» дип исемләнгән Беренче халыкара җыен үтәчәк

Рәсәй халыклары берләшү көннәре алдыннан, 1 ноябрьдән 3 сенә хәтле Татарстан башкаласында «Мультимәдәни дөньяда Ислам» дип исемләнгән Беренче халыкара форум үтәчәк. Бирегә Рәсәй, АКШ, Пакистан, Төркия, Иран, Малайзия, Кытайдан ислам әйдаманнары киләчәк.

Форумны Татарстан Илбашы Аппараты ярдәмендә Казан федераль университеты Көнчыгыш телләр һәм халыкара мөнәсәбәтләр Институтының төбәк һәм ислам фәннәре кафедрасы, КФУ университетының юридик факультеты һәм Мәрҗәни Фонды (Мәскәү) үткәрә.

Форумның төп темасы булып мәдәниятара сөйләшү мәсьәләләре, 21 гасырда төрле фикердә булучы вәкилләрнең килешеп яшәве, ислам белеменең актуаль, классик проблемалары һәм постколониаль тикшерүләр тора.

«Мондый форум Казанда беренче тапкыр үтә, — ди Көнчыгыш телләр һәм халыкара мөнәсәбәтләр Институтының төбәк һәм ислам фәннәре кафедрасы җитәкчесе, профессор Ренат Беккин, — без аны ел саен үткәрергә дип торабыз. Җыенның максаты — бар илләрдән килгән ислам галимнәре-белгечләре өчен аралашу мәйданчыгы булдыру. Бу вакыйга Казанда очраклы гына түгел — Казан университеты мөселман Көнчыгышын өйрәнү өчен бик яхшы үзәк дип карала.»