Мэр Халыкара өлкәннәр көнендә мунча хезмәте оештырылуга канәгатьсезлек белдерде

Картлык буенча пенсиягә чыкканнарга 1 октябрь — Халыкара өлкәннәр көнендә Казанның бары тик «Комбытсервис» ААҖнең 8 мунча комплексы гына бушлай юынып чыгу мөмкинлеге биргән иде, ләкин моның өчен 10, 11 сәгатьләрдән көндезге 3кә кадәр генә вакыт каралган. Шушы вакыттан соңрак килүче өлкән казанлылар исеменнән шәһәр башлыгына шикаять белән мөрәҗәгать булган.

Бүген Казан муниципаль берәмлеге органнары һәм аның Башкарма комитеты подразделениеләре җитәкчеләренең «дүшәмбе киңәшмәсе»ндә мэр Илсур Метшин, мунчаның шундый көнне өлкәннәр өчен 3кә кадәр генә эшләве — ЧП, моны шулай кабул итәргә кирәк, диде. «Комбытсервис» җитәкчесе алардан суны кызганганмы, бик күп акча югалтам дип курыкканмы әллә, әмма социаль җаваплылык социаль бизнес җилкәсендә дә икәнне онытырга ярамый. Бу хәлләрдән соң, аның аяк астындагы җир янарга тиеш, югыйсә», — дип зур канәгатьсезлек белдерде мэр. Шулай ук шәһәр Башкарма комитетына һәм социаль яклау мәсьәләсендә җаваплы түрәләргә дә, алар кая караган, дип шелтә эләкте, дип хәбәр итә «Татар-информ»