“Сөләйман” мәчетендә күрмәүчеләр өчен чираттагы курслар башланачак.

15 октябрьдә «Сөләйман» мәчетенең Тернәкләндерү үзәгендә күрмәүчеләр өчен чираттагы махсус курслар башлана. Бу юлы егермеләп ир-ат ислам нигезләренә һәм Луи Брайль ысулы буенча укырга өйрәнү бәхетенә ирешә алачак.

Курсларга Рәсәйнең төрле төбәкләреннән киләчәкләре мәгълүм. Шулай ук Әстерхан өлкәсе, Удмуртия, Башкортстан, Дагыстан республикалары һәм Татарстанның Актаныш, Менделеевск, Алабуга, Бөгелмә районнарыннан килүчеләр көтелә.

Курслар ай дәвамында барачак. Бу вакытта күрү мөмкинлекләреннән мәхрүм булучыларга Луи Брайль ысулы ярдәмендә Изге Коръән уку серләренә төшенергә, җирлектә ориентлашырга һәм компьютердан файдаланырга ярдәм итәчәкләр.

Курста булучыларга төрле мәдәни чаралар да планлаштырылган. Шәһәр буйлап экскурсия кылу һәм татар театрларына йөрү дә исәпкә алынган. Гадәттә, оештыручылар тарафыннан һәрбер шәкерткә юлда йөрү, яшәү һәм туклану чыгымнары мәчет хисабыннан башкарылуы мәгълүм.