Төбәкләрдә мөселманнар өчен ял көннәрен билгеләргә рөхсәт ителә

РФ Дәүләт Думасына җирле традицияләргә нигезләнеп, ил төбәкләренә өстәмә бәйрәм көннәрен гамәлгә кертү мөмкинлеге бирүче закон проекты кертелгән. Бу хакта ИТАР-ТАСС агентлыгы хәбәр итә.

Беренче чиратта, әлеге яңалык күпчелек халкын мөселманнар тәшкил иткән республикаларга кагылачак. Закон проектының авторлары –Гражданлык, җинаятьләр турындагы, арбитраж һәм процессуаль законнар буенча комитет башлыгы Павел Крашенинников белән Дәүләт Думасының беренче вице-спикеры Олег Морозов.

Павел Крашенинников шәрехләп узганча, Хезмәт кодексының 112 нче маддәсенә субъектларга федераль бәйрәмнәргә өстәмә рәвештә бәйрәмнәр булдыру хокукы бирүче нигезләмә беркетеләчәк. «Төбәкләр үз законнары белән аларның нинди бәйрәмнәр буласын үзләре билгели», дип ассызыклады ул. Крашенинников Хезмәт кодексының Россия һәм аның субъектларының уртак карамагында булуы һәм вөҗдан иреге, дини берләшмәләр турындагы гамәлдәге закон бу мөмкинлекне бирә, дип искәртә.

Инде хәбәр ителгәнчә, агымдагы елның июнь аенда Уфада яшәүче Сергей Дулов Башкортстан Югары судына Ураза һәм Корбан бәйрәмнәрен законсыз дип табуны таләп иткән мөрәҗәгать юллаган иде. Ул республика халкы ял итә торган әлеге дини бәйрәмнәр дискриминация нигезендә үзенең хезмәткә булган хокукларын боза дип саный. Республика Югары суды бу мөрәҗәгатьне кире какса, РФ Югары суды Башкортстан Югары суды карарын гамәлдән чыгарып, Ураза һәм Корбан бәйрәмнәренең эш көне булырга тиешлеген таныган иде. ]