РФ Югары суды Ураза һәм Корбан бәйрәмнәренең эш көне булырга тиешлеген таныды

Башкортстанда Ураза һәм Корбан бәйрәмнәре моннан соң ял көннәре булмаска мөмкин. Агымдагы елның июнь аенда Уфада яшәүче Сергей Дулов Башкортстан Югары судына әлеге бәйрәмнәрне законсыз дип табуны таләп иткән мөрәҗәгать юллаган иде. Ул республика халкы ял итә торган әлеге дини бәйрәмнәр дискриминация нигезендә үзенең хезмәткә булган хокукларын боза дип саный. Республика Югары суды бу мөрәҗәгатьне кире каккан иде. Ә менә РФ Югары суды Башкортстан Югары суды карарын гамәлдән чыгарды, ягъни Ураза һәм Корбан бәйрәмнәренең эш көне булырга тиешлеген таныды.

«Интерфакс» агентлыгы хәбәр иткәнчә, Башкорстан парламенты моңа ничек җавап бирергә икәнен ачыклап бетермәгән. Парламентның матбугат үзәге җитәкчесе Илгиз Абдуллин сүзләренә караганда, Корылтайга әлегә РФ Югары судының карары язма рәвештә кермәгән, дип яза "Татар-Информ". Шуңа парламент аңа карата дәгъва белдерү хакында конкрет карарга килмәгән. Ул шул ук вакытта Корылтайның үзенә бирелгән законлы хокукларыннан файдаланып, РФ Югары судының карары белән килешмичә, төрле суд инстацияләренә мөрәҗәгать итү ихтималын кире какмый.